Asínase o contrato para executar a reurbanización da rúa Travesa

O goberno municipal pretende humanizar as principais vías do Milladoiro co fin de favorecer o tránsito peonil. Con ese obxectivo o alcalde de Ames, Carlos Fernández, e o representante da empresa Construcciones Ponciano Nieto SL, acaban de asinar o contrato para executar as obras de reurbanización da rúa Travesa. Este proxecto foi adxudicado por un importe de 312.180 euros e está sufragado integramente pola Deputación da Coruña, a través do Plan anticrese posto en marcha polo organismo provincial e mediante o convenio denominado O Milladoiro o que está por ver. Deste xeito ampliaranse as beirarrúas e construírase un parque infantil co obxectivo de converter esta rúa en peonil. Esta obra únese á realizada na rúa de Anxeriz e ao proxecto de reurbanización da Travesía do Porto.

Por outra banda estase traballando para executar o proxectado de urbanización da Travesía do Porto, que se converterá no principal viario da zona norte desta localidade.